PASADAS tódalas Francias
por Ocitania ou Gascuña
ou de París a Iruña
xa diluidas distancias.
A Aragón por Cataluña
ou polo Norte por Son.
En pasádalas Navarras
as cadeas e as barras.
Pasados León e Castela
por Castela a León.
En pasado Monte Irago
e xa na Lingua de Galicia
Ponferrada e Vilafranca
deixando a chaira estanca
enas mesmas portas dela.
O Valcarce e sin perguicia
/as penas de garamela/
apeitar para o Cebreiro
polo marcado carreiro
que a neve volve vago.
Encarar o porto incerto
o longo cerengo aberto.
A un lado i autro del
todo o horizonte en vela
os Ancares i o Courel.
Pasada Triacastela
do Iribio as faldras fago.
E por Samos Sarria a Lugo.
Oh Lugo a ti me adugo
e sólo por ti me arredo
que ben mereces desandes!
Ver a Ponte a antiga vía
a Muralla a Catedral
de Dona Santa María
o Coro e o Grial.
E ver fincadas rezar
coma co antigo medo
poñer a súa alma núa
didiante dos Ollos Grandes.
E despois de rodear
de rodear e de estar
que non se fai o camiño
sólo para rematar
cruza e debruza no Miño:
Portomarín sulo lago.
Palas Melide Arzúa
E logo xa Compostela
/Monxoi! Eoi! Ei Santiago /
e pararme á vista dela
mirar como eu o fago.

1993

Cebreiro Monte Irago Ponferrada Valcarce Villafranca Ancares Courel Lugo Samos Sarria Arzúa Compostela Coro Dona Santa María Grial Iribio Melide Monxo Muralla Ollos Grandes Palas Portomarín Triacastela Aragón Castela Cataluña Francia Galicia Gascuña Iruña León Miño Navarra Ocitania París Santiago A Ponte Camiño

EN chegado a Santiago
e logo despois qué fago?

En chegado a Compostela
e despois de vela a ela?

Compostela


DENDES do Limia hastr-o Norte
do Courel hastr-o mas forte.

Courel Limia Mar forte

NON só as vellas cidades
catedrais e abadías
vales e altas soedades
ser a beira nas dez rías.


CANTO ollas pasas deixas:
da palloza o aire rudo
os ramallos de cereixas
do cargado carnabudo.

Palloza



TÓDALAS neves raseadas
tódalas nebras resgadas
loairas e ventaladas
tódalas lúas iradas.




CON carambelos por beiras
detrala neve as xeadas
palloza a raxos desnevia
sin fumo deshabitada.

ENCONTRAR no Cebreiro a atrancada:
neve folga no tourón basada.
De polvoriña e xistra rexeitado
á Faba i a Lagúa a arrecadadas.
Esbarar ó Valcarcel en irado
a favor das barras aguzadas.
Repetidas súpetas petadas
entre piornos tornos xestas
hastra o val das augas batanadas.

Das Ferrerías á Veiga i Ambasmestas.
Volver por Vilafranca á empinada
por Corullón e Oencia /por Vilarrubín
a Ferramulín /pasadas Vilarrubín
Ferramulín Horreos pechado /
Hastra a Boca do Couto i a Parada.

Por Savane á Pedra nova remontada
cruzando o Courel de lado a lado.
E por Lóuzara /Padrocelos de Martín
trovador / Hastra Samos. Retomado
o Camiño tra-la corta rodeada.

Courel Samos Cebreiro Valcarce Villafranca Ambasmestas Boca do Couto Corullón Faba Ferramulín Oencia Savane Veiga Parada Ferrarías Hórreos Lagúa Vilarrubín Louzara Pradocelos de Martín Camiño Pedra Pradocelos


DE Visuña ó Couto.
…………
Se a neve apura
do Couto ó souto
en dereitura.

Ou por Lago ós Chaos de Outeiro
por en de frente do Fedo
por debaixo de Campelo
polo Real do Carbedo de cara o torrepenelo
cara o castelo rocheiro
no que inda está Dona Ildara
posta na fiestra para Tara
vendo o camiño i o Lor
anque sin ver que se move
oindo o ampre rumor
que do val ate ela sabe
e atendendo ó seu señor.
O mesmo que ó outro lado
pola banda da Seara
nun covallo anseiosa
agarda Dona Briosa.
Ambas agardan por el
entre aldeas lenes fumes
/a coor do ucedo nos cumes /
cal se agarda no Courel.

Courel Campelo Carbedo Couto Fedo Lor Seara Tara Visuña Chaos de Outeiro Lago Dona Briosa Dona Ildara



SULA pestana xabreira
Pena das Augas xeada
cando estiña a pincheira
dende o cimo despenada.

Pena das Augas